Jilli Koree Dhaabbii Caffee Oromiyaa Addee Alamnash Asfaawuun hoogganamu hojii hordoffiifi to’annoo taasiseen bu’uuraalee misoomaafi kenniinsa tajaajilaa Godina Horroo Guduruu Wallaggaa Aanaa Jimmaa Gannatii keessatti hojjetamaa jiru daawwatee qaamolee mootummaafi hooggansa sektaroota Aanichaa waliinis mari’achuun kallattii kaa’ee jira.

Jilli Koree Dhaabbii kun, hojii misoomaa Ganda Gidaamii Dabshoo keessa jiru, ‘Farmer Training Center’ (FTC), Buufata Fayaa Gandichaa, daandiiHaratoo Waayyuufi kkf daawwatee jira. 
Bu’uuruma kanaan, hojiiwwan misoomaa daawwatamaniifi marii uummataa taasifame irraa ka’uun hooggansa Aanichaa waliin mariyachuun kallatii kaa’ee jira. Kunis, buufanni fayyaa gandicha keessatti argamu gama kenniinsa tajaajilaatiin sochii gaarii irra kan jiru ta’uun, hirmaannaan uummataa sochii misoomaa keessatti qabu gaarii ta’uun, dubartoonni baadiyyaa waldaalee adda addaatiin ijaaramuun qusannoo maallaqaa, yeroo dahumsaafi rakkinoota adda addaa irratti ‘Ambulance’ aadaatti fayyadamuun kan wal deeggaran ta’uun, kenniinsa haqaan walqabatee dhimmoonni RTDn ilaalaman gaarii ta’uun dhimmoota akka ciminaatti jilli koree Dhaabbii kun hawaasa Aanichaa mariisisuuniifi daawwannaa taasiseen ilaale keessaa isaan ijoo dha.

Walgahichaa haasawaan kan banan Afyaa’ii Caffee Mootummaa Naannoo Oromiyaa Kabajamoo Obbo Lammaa Magarsaa akka ibsanitti, Caffeen Oromiyaa, aantummaa uummata bakka isa buufateef qabu caalaatti mirkaneessuuf, tumsa barbaachisu taasisuuf, ergama guddaa kan qabuufi adda durummaan qaama itti gaafatamummaa dachaa qabu waan ta’eef, mul’ata akka Naannichaattis ta’e akka biyyaatti gama misooma diinagdeetiin sadarkaa biyyoota galii giddu galeessaa qaban cinaa hiriirsuuf qabamee jiru galmaan gahuuf, hudhaalee kanneen akka rakkoo bulchiinsa garii irratti Caffeen keenya xiyyeeffannaa addaa kennuun irratti hojjechaa kan turee fi gara fuula duraattis kan hojjetu akka ta’e waltajjicharratti ibsameera.