Waltajjii kana irratti argamuun haasawaa baniinsaa kan taasisan Kab. Aadde Sa’aadaa Abdurahmaan, badhaadhina biyyaafi maatii milkeessuuf hojjechaa jirru keessatti gaheen dubartoonni Miseensota Caffee qaban olaanaa ta’uu ibsuun, waggoota shanan hojii bakka bu’ummaa ummataa hojjetan keessatti itti gaafatamummaa dachaa isaanitti kenname gahumsaan bahachuu akka qaban dhaaman.

Kanaaf, karaa bittinnaa’een osoo hin taane gurmuu qabaattanii dubartoota isin booda jiraniifi ummata bal’aa bakka isin buufateef sagalee ta’uun tajaajiluu qabdu kan jedhan Kab. Aadde Sa’aadaan, hirmaannaa diinagdee, siyaasaafi hawaasummaa keessatti qabdan adda durummaan bahachuu akka qaban ibsan.

Afyaa’iin Caffee Oromiyaa Kab. Aadde Sa’aadaa Abdurrahmaan, ergamoota gurguuddoo Heeraafi ummata keenyaan nutti kenname qabannee fayyadamummaa ummataa mirkaneessuun ergama bakka bu’ummaa keenya gahumsaan bahachuu qabna jedhan.

Kanaaf, seerota bahan qorannoon deeggaruun bu’a qabeessummaa isaanii mirkaneessuun, dhaqqabummaa seerota keenyaa hawaasa bal’aa biraan gahuuniifi hojii hordoffiifi to’annoo gaggeessinuun rakkoo ummata keenyaa furuun hojii xiyyeeffannoo addaan irratti hojjechuu qabnudha jedhan.

Tajaajila si’ataafi qulqulluu ta’e kennuun hojii keenya fakkeenyummaa gaariin hojjechuufi miira tajaajiltummaan hawaasa keenya tajaajiluu qabna kan jedhan ammoo Afyaa’ii I/A/Caffee Oromiyaa Kab. Obbo Eeliyaas Ummataati.