CAFFEE – (Waxabajjii 10, 2014): Argannoo Odiitii irratti hooggansa Waajjira Maallaqaafi Galii Godinaalee 21fi Magaalota 38 waliin Adaamaatti mari’atamaa jira.
__//__
Argannoon Odiitii Keessaa Biiroo Maallaqa Oromiyaafi Odiitiin Waliigalaa Mana Hojii Odiitara Muummicha Oromiyaatiin gaggeeffamaa ture hooggansi manneen hojii lamaanii walduraa duubaan bu'aa argannoo odiitii isaanii gabaasa dhiyeessaniiru.
Hoogganaa Biiroo Maallaqaa Oromiyaa Obbo Tolasaa Gaddafaa, gabaasa waliigala Argannoo Odiitii keessaa (odiitara keessaa), herreega walitti qabamaafi kanfalamaa sadarkaa Naannoo, Godinaa, Magaalaafi Aanaatti jiru dhiyeessaniiru.
Itti fufuunis, I/A/Hoogganaa Mana Hojii Odiitara Muummicha Oromiyaa Obbo Tolasaa Abboomaa, Argannoo Odiitii Waliigalaa Bara 2011 -2013tti gaggeeffamee hordoffii hojiirra oolmaa yaada odiitii taasifameen Godinaaleefi Magaalota dhimmi ilaaluuf gabaasa qophaa’e dhiyeessaniiru. Gabaasa dhiyaate irrattis mariin kan gaggeeffamu ta'a.
CAFFEE - (Waxabajjii 08,2014): Afyaa'iin Caffee Oromiyaa Kab. Aadde Sa'aadaa Abdurrahman Jila Koreewwan Dhaabbii Mana Maree Bakka Bu'oota Ummataa waliin tarkaanfii mootummaan seera kabachiisuuf fudhachaa jiru irratti mari'atan.
__//__
Mana Maree Bakka Bu'oota Ummataatti Jilli Koree Dhaabbii Dhimmoota Seeraa, Haqaafi Demokiraasii tarkaanfii mootummaan naannichaa seera kabachiisuuf fudhachaa jiru ilaalchisee Godinaalee, Aanaaleefi Magaalota muraasa keessatti daawwannaa qaamaa taasisu sababeeffachuun Waajjira Caffeetti argamuun Afyaa'ii Caffee Oromiyaa Kab. Aadde Sa'aadaa Abdurrahmaan waliin marii duraa taasisan.
Haala waliigala Nageenya Naannichaafi tarkaanfii Mootummaan seera kabachiisuuf fudhachaa jiru, akkasumas, hirmaannaa ummanni qaamolee nageenyaa waliin ta'uun nageenya naannoo isaa itti tikfachaa jiru ilaalchisee jila kanaaf ibsa waliigalaa kan kennan ammoo I/A/Biiroo Bulchiinsaafi Nageenya Oromiyaa Jeneraal Abbabaa Garasuuti.
Korichi turtii naannicha keessatti taasisu erga raawwateen booda argannoofi bu'aa daawwannaa isaa Kab. Afyaa'ii Caffeef gabaasa ni dhiyeessa.
CAFFEE - (Waxabajjii 08,2014): Caffeen Oromiyaa Mana Maree Bakka Bu'oota Ummataatti argamuun muuxannoo hojii qooddate.
__//__
Jila I/G/Waajjira Caffee Oromiyaa Kab. Obbo Indaashaw Birhaanuu, Dura Taa'ota Koreewwan Dhaabbii Caffeefi Daarikteerota of keessaa qabuun 'ANAA DHUFU' kan jedhan Afyaa'ii I/Aantuu Mana Marichaa Kab. Aadde Loomii Badhooti.
Jilli kun, Mana Maree Bakka Bu'oota Ummataatti argamuun gurmaa'ina mana marichaa, hojiiwwan seera tumuu, bakka bu'ummaa ummataa, hordoffiifi to'annoofi kkf irratti muuxannoo hojii qooddate.
