CAFFEE - (Onk. 25,2013): Koreen Dhaabbii Dhimma Misooma Magaalaa Caffee Oromiyaa raawwii kurmaana 1ffaa manneen hojii 9 gamaaggameera. __//__
Koreen kun, Raawwii hojii Biiroo Misooma Magaalaafi Manneenii, Biiroo Bulchiinsaafi Itti Fayyadama Lafaa, Biiroo Intarpiraayiziifi Misooma Industirii, Komiishinii Invastimantii, Inistitiyuutii Pilaanii, Ejensii Dhimma Hawaasa Misoomaaf Kaafamuu, Waldaa Aksiyoona Daldala Faayinaansii Meeshaalee Kaappitaalaa, Dhaabbata Bulchiinsa Gamoowwaniifi Waldaa Aksiyoona Liqiifi Qusannaa Oromiyaa gamaaggamee jira.
Manneen hojii hunda biratti hojiin boqonnaa qophii keessatti raawwataa qopheessuu, raawwiin hojii kurmaanaa akka mana hojiitti hojjetaa waliin madaalamee dhiyaachuufi raawwiin hojii waliigalaan jiru akka ciminaatti kan madaalame ta’uu koreen kun ibseera.
Haata’u malee, dhimmoonni xiyyeeffannaa addaan irratti hojjetamuu qabu jedhamanii adda bahan, Gama Biiroo Misooma Magaalaafi Manneeniitiin kenna tajaajilaa, bulchiinsa manneen mootummaa, caalbaasii piroojeektotaa yeroon xumuuruu dhabuu, ijaarsi manneen waliinii Magaalota akka Asallaa, Ciroo, Shaashamanneefi kan biroo keesa jiran yeroon xumuuramuu dhabuun akka hanqinaatti ilaalameera.
Biiroo Misooma Intarpiraayiziifi Industiriin walqabatees, godinaalee hundatti carraa hojii karaa walfakkaatuun uumuu dhabuun, liqii bule deebisiisuu dhabuufi waltajjiin Mana Maree IMX sadarkaan jiru itti fufiinsa kan hin qabne ta’uu koreen kun madaalee jira.
Bulchiinsa Lafaan walqabatees, ijaarsaafi qubannaa seeraan alaa dhaabsisuu dhabuun, hojiin kaadaastara lafaa karaa walfakkaatuun hojjetamuu dhabuun, walharkaa fuudhiinsi gandoota baadiyyaafi magaalaa xiyyeeffannoo dhabuurraa kan ka’e saamicha lafaaaf saaxilamuu, kenniinsi tajaajila lafaa kiraa sassaabdummaa irraa bilisa ta’uu dhabuun hojii xiyyeeffannoo barbaadu ta’uu ibsuun qoratee jira.
Invastimantiin walqabatee, qonnaan bulaafi horsiise bulaa gara Invastimantiitti ceessisuuf raawwiin godinaalee walfakkaachuu dhabuuniifi misooma invastimantiin walqabatee rakkoo ilaalchaa jiru bu’uurarraa hiikuu dhabuun akka hanqinaatti dhimmoota ilaalaman keessaa isaan ijoodha.
Walumaagalatti, hojiiwwan kurmaana 1ffaa keessatti harca’anii hafan karoora kurmaana 2ffaa keessatti xiyyeeffannoo olaanaan hojjetamuu akka qabaniifi manneen hojii akkaataa amala hojii isaaniitiin qindoominaan waliin hojjechuu akka qaban Dura Taa’aan Korichaa Obbo Lachiisaa Hayyuu ibsan.
